“પણ હું ગયા જન્મમાં મનુષ્ય જ હતો એ કેમ ખબર પડે? કુતરો બિલાડો નહીં હોઉં એની શું ખાતરી?”

નકુલભાઈએ કટાક્ષયુક્ત અવાજે પૂછ્યું.

“84 લાખ યોનિમાં ફર્યા પછી મનુષ્ય યોનિમાં જન્મ મળે છે. સારા કર્મો કર્યા હોય તો જ આ યોનિમાં જન્મવા મળે અને સારા કર્મો મનુષ્ય જ કરી શકે એટલે તમે ગયા જન્મમાં મનુષ્ય જ હશો નકુલભાઈ”કક્કડ સાહેબ ખુબ વિશ્વાસથી બોલ્યા.

પણ 84 લાખ યોની હશે એનો શું પુરાવો?

“શાસ્ત્ર વાંચો એટલે બધી ખબર પડશે સાહેબ” કક્કડ સાહેબે જ્ઞાનની ગંગોત્રી બતાવી દીધી.

પણ શાસ્ત્ર તો મારા જેવા કોઈક નવરાએ લખ્યું હશે ને?

“શાસ્ત્ર માટે તમે આવા હલકા શબ્દો ના વાપરો નકુલભાઈ, તમારે ના માનવું હોય તો ના માનો પણ આ રીતે શાસ્ત્રનું અપમાન ના કરો” અત્યાર સુધી અહિંસક મહાત્મા ગાંધી લાગતા કક્કડ સાહેબમાં અચાનક ભગતસિંહ પ્રગટયા.

અનપેક્ષિત અણધાર્યો હુમલો થયો એટલે સળગતું લાકડું હાથમાં પકડયાનો અહેસાસ થતાં જ નકુલભાઈએ વાત વાળતા કહ્યું “ચલો છોડો, બીજી ચા પી નાખીએ એક એક”

“પિયુષ તાત્કાલિક 3 અડધી ચ્હા કહેજે” કક્કડ સાહેબ આકરા અવાજે ઓફીસ બોયને સંબોધીને બોલ્યા.

આમાં તાત્કાલિક શબ્દ પર અપાયેલો ખાસ ભાર ક્ષેપકભાઈથી છૂપો ના રહ્યો.

આપ શું કરો છો કક્કડ સાહેબ? વાત વાળવાના આશયથી ક્ષેપકભાઈએ પ્રશ્ન પૂછ્યો.

“હું ઘણું બધું કરું છું એક સાથે, સવારથી 6 વાગ્યાથી બીઝી હોઉં છું. કક્કડ સાહેબે આપેલો ગોળ ગોળ જવાબ, ગપચાવેલો સાચો જવાબ અને પતાવોને યાર” નો આપેલ સંદેશ રૂમમાં બેઠેલા પાંચેય વ્યક્તિઓથી છાનો રહ્યો નહીં.

થોડીવાર વાતાવરણમાં ચુપકીદી છવાઈ ગઈ, ધીમે ધીમે આ ચુપકીદી અસહ્ય થતી ગઈ.

અમદાવાદના સમૃદ્ધ એવા આંબાવાડી વિસ્તારની એક ઓફિસમાં વાક્ બારસની સમી સાંજે ઉપરોક્ત ગરમાગરમ ચર્ચા ચાલી રહી હતી બલ્કે કહો કે ચર્ચા ચાલુ થયાં પછી ગરમાગરમ થઇ ગઈ હતી અને વાક્ બારસે બધા અવાક્ થઇ ગયા હતાં.

લગભગ સાઠે પહોંચેલા અને એક ચોક્કસ ઘરેડમાં બંધાયેલા પીઢ નકુલભાઈ અને બિઝનેસમેનની સાઇકોલોજીમાં ઊંડું ખેડાણ કરી ચૂકેલા ક્ષેપકભાઈ એક બિઝનેસ પ્રપોઝલ લઈને કક્કડ સાહેબની આંબાવાડીવાળી ઓફિસે આવ્યા હતાં. જ્યાં પહેલેથી અન્ય 2 વ્યક્તિઓ જે નકુલભાઈ અને ક્ષેપકભાઈ માટે અજાણી હતી તે હાજર હતી.

મિટિંગની શરૂઆત તો સામાન્ય રીતે જ થઇ પણ આ પ્રપોઝલ પ્રમાણે ધંધો ચાલશે કે નહીં એની વાત કરતાં કરતાં “ભ’ઈ આ તો બિઝનેસ છે, કોઈ સફળ પણ જાય અને કોઈ નિષ્ફળ પણ જાય, બધું ઉપરવાળાના હાથમાં છે, જેવા જેના કર્મ” એમ કક્કડ સાહેબ બોલ્યા અને વાતે અચાનક અણધાર્યો વળાંક લીધો.

“ધર્મ-કર્મમાં માનનારો ગમે તેમ તોયે માનસિક પછાત, કામચોર અને જવાબદારીથી ભાગનારો હોય છે” એવી માન્યતાથી પીડાતા(!) નકુલભાઈ એવી માન્યતાવાળાની ખીલ્લી ઉડાડવાની એક પણ તક જતી કરતાં નહીં, એટલું જ નહીં પણ વરસોવરસનું હોમવર્ક કરીને ધારદાર તલવારછાપ દલીલોનો પટારો એમણે ભેગો કરેલો. જે હંમેશા સામેવાળાને પછાડી દેવાના કામમાં આવતો અને એમાં નકુલભાઈને દર વખતે ભવ્ય સફળતા પણ મળતી.

આવી જ એક વધુ તક એમને અનાયાસે આંબાવાડીની કક્કડ સાહેબની આ ઓફિસે વાતમાંથી વાત નીકળતાં મળી ગઈ, અને એમણે રાબેતા મુજબ હુમલો ચાલુ કરી દીધેલો.

ચ્હા આવી અને ચુપચાપ ચૂસકીઓ લેવાવા માંડી પણ કોઈ એક પણ શબ્દ બોલતું નહોતું.

એક પણ શબ્દ ના બોલાતો હોવા છતાં વાતાવરણમાં ઘણું બધું કહેવાઈ ગયેલું ગુંજતું હતું. અરે! જાણે હજી કહેવાઈ રહ્યું હતું.

“આ તમે ચ્હા પીઓ છો તે પણ તમારા અને કક્કડ સાહેબના ગયા ભવના કાર્મિક રિલેશનના કારણે જ છે, નહીં તો આ જન્મે તમે એકબીજાની ચ્હા પીવા ભેગા જ ના થાત” ક્યારનીયે શાંત બેઠેલી ભાવી અચાનક બોલી.

તમારો પરિચય?? નકુલભાઈએ થોડા તીખા સ્વરે પૂછ્યું.

“હું વાસ્તુશાસ્ત્રી છું, સાથે ન્યુમરોલોજી પણ કરું છું, તમારી જન્મતારીખ પરથી કઈ જગ્યા તમને ફળશે કે કેમ એ કહી દઉં” ભાવીએ પોતાનો 30 સેકન્ડ ઈન્ટ્રો આપ્યો.

એટલે ઘર કે ઓફિસ લેતા પહેલાં તમને બતાવવાનું એમ ને? એટલે પછી એ ઓફિસમાં નફો જ નફો, ઓફિસમાંથી કોઈ નોકરી છોડશે જ નહીં, કસ્ટમરના ઓર્ડર આવ્યા જ કરશે અને ઘરમાં કોઈ બીમાર પડશે જ નહીં, કેમ કે વાસ્તુશાસ્ત્રીએ સર્ટિફાઇ કર્યું છે. વ્યંગ બાણને બદલે વ્યંગ તોપનો મારો ચલાવ્યો નકુલભાઈએ.

ના એવું નથી, બીમારી તો તમારા કર્મોના કારણે આવે છે, પણ હું કોઈ પણ બીમારીને પણ હિલ કરી દઈશ કેમ કે હું હિલર પણ છું; ક્રિસ્ટલ હિલર. ભાવી બોલી. જાણે 30 સેકન્ડ ઈન્ટ્રો 45 સેકન્ડનો થયો.

“તો તો પછી હોસ્પીટલોના વાસ્તુ કરવામાં મૂંઝારો થતો હશે ને? વાસ્તુ પ્રમાણે હોસ્પિટલને ધીકતી કરીએ તો સમાજ બીમાર પડે અને જેમણે ઘરનું વાસ્તુ કરાવ્યું છે એ ક્યારેય બીમાર જ ના પડે; કેવી કશમકશ?” લોજીકમાં ઝબોળેલું, અર્જુનની જેમ લક્ષવેધ કરતુ, અચૂક કામ પાર પાડતું સણસણતું તીર નકુલભાઈએ રૂમમાં હાજર ચારેય તરફ એક સાથે ફેંક્યું.

આ પ્રશ્ન પૂછ્યા પછી નકુલભાઈ પણ હંમેશની જેમ રાજા પાઠમાં આવી ગયા કેમ કે એમને એવી ખાતરી થઇ ગઈ હતી કે એમની લોજીકયુક્ત તીરંદાજીનો કોઈની પાસે ઉકેલ નહીં હોય.

ના, એવું નથી. પ્રાણીક હીલિંગમાં આનો ઉપાય છે, તમારાથી અજાણતામાં થયેલા કર્મો અને નડતા કર્મોનું ક્લીનઝિંગ(સાફસફાઈ) પણ થઇ શકે છે. અત્યાર સુધી ચૂપ બેઠેલી સિદ્ધિ અચાનક ચર્ચામાં ટપકી અને ટહુકી.

ક્યારનાયે ચ્હા પીને જાઉં જાઉં કરતાં નકુલભાઈ હવે તો બતાવી જ દઉં ની મુદ્રામાં આવી ગયા.

“તો તો તમારા જેવા લોકોની બહુ જરૂર છે સમાજમાં. જે પાર્ટીએ આટલા વર્ષ રાજ કર્યું અને દેશને લૂંટ્યો એ બધા તમારી પાસે આવીને એમના પાપ ધોવડાવીને નવા નક્કોર થઇ જાય હેં ને?” નકુલભાઈને સિદ્ધિની ઉંમર જોઈને એને કાચી ખેલાડી ધારી લીધેલી એટલે એને ઘેરવાનું શરુ કર્યું.

“ના હોં, મારા પપ્પા એ પાર્ટીના કાયકર્તા અને જિલ્લા અધ્યક્ષ હતાં અને એમણે એવા કોઈ પાપ નથી કર્યાં. લૂંટવાનું કામ તો તમારી હાલની શાસક પાર્ટી કરે છે” સિદ્ધિનો ટહુકો નાનકડી ત્રાડમાં ફેરવાયો.

વર્તમાન સમયની શાસક પાર્ટીમાં સારી વગ ધરાવતા નકુલભાઈએ હવે પાર્ટીની જતી ઈજ્જત અને એની પર થતા આક્ષેપો સામેની બચાવ કામગીરી સ્વેચ્છાએ સ્વીકારી અને લગભગ 12 મિનિટ સુધી તમારી પાર્ટી સાવ થર્ડકલાસ છે અને એના કારણે દેશ ખાડે ગયો છે વાળો મારો બંને જણાએ સામસામે ચલાવ્યો. સિદ્ધિ ગાંઠતી નહોતી અને નકુલભાઈ ગાંઠે બાંધીને ફરતા હતાં.

“રાજકારણી હો કે આપણે, સૌ સૌના કર્મોનું કમાય છે” ફરી ભાવીનો એનો એ જ સંદેશ ફરી ફરીને આવ્યો.

“હું કર્મની થિયરીમાં માનતો જ નથી. એવું કશું હોય જ નહીં” નકુલભાઈએ જાણે દુનિયા કેમ ચાલે છે નો દસ્તાવેજ લખી આપ્યો.

તમે એકાદવાર 2-3 કલાકનો સમય લઈને આવો હું તમને કર્મની થિયરી આખી સમજાવી દઈશ. કક્કડ સાહેબ બોલ્યા. થોડા આકરા પાણીએ થયા હતાં એ અવાજમાં વર્તાઈ રહ્યું હતું

ના ભાઈ ના, મારે કંઈ સમજવું નથી. નકુલભાઈને છેક હવે મૂળ વાતે આવવાનું સૂઝ્યું. આપણે ધંધાની વાત પર આવીએ. પેલા ડીલમાં હવે કેમનું કરવાનું છે? મારી પાર્ટી તો પેમેન્ટ લઈને તૈયાર બેઠી છે. ક્યારે ફાઇનલ મિટિંગ કરવી છે? એ બધા કેશ ચેક એક જ દિવસે એકી સાથે આપવા તૈયાર છે. એમના તરફથી તો સોદો ફાઇનલ છે.

ના, એક કામ કરો 6-7 દિવસ જવા દો, દિવાળી પછી શાંતિથી મળીએ.

અરે! પણ ગઈકાલ સુધી તો તમે પાર્ટી લાવો પાર્ટી લાવો કરતાં હતાં અને હજી કાલે તો તમે કીધું યાર કે દિવાળી પહેલા ડીલ ફાઇનલ કરવું છે. નકુલભાઈ આ ડાયવરઝનથી ડઘાઈ ગયાં.

હા, પણ હવે દિવાળી પછી જ કરીએ. કક્કડ સાહેબે કહ્યું.

પછી પાર્ટી જતી રહેશે, બીજી પાર્ટી શોધતાં શોધતાં 2-3 મહિના નીકળી જશે. શું કામ ડીલ પાછળ ઠેલવું છે?

 

ના, દિવાળી પછી જ રાખીએ. કક્કડ સાહેબ પહેલાં કરતાં વધારે મક્કમ જણાયા.

“જેવી તમારી મરજી, ચાલો તો અમે નીકળીએ” ધૂંધવાયેલા નકુલભાઈએ કહ્યું.

હાથ મિલાવી બહાર નીકળ્યા અને ગાડી સુધી ચાલતાં ચાલતાં તો નજીકની એક કીટલીએ બંનેના પગ આપ મેળે થંભી ગયા અને અમદાવાદી રિવાજ પ્રમાણે 2 અડધી ચ્હા વગર કીધે આવી પણ ગઈ.

પહેલી જ ચુસ્કી સાથે નકુલભાઈએ ગુસ્સો ઠાલવવા માંડ્યો કે આ કક્કડમાં અક્કડ ઘણી છે પણ અક્કલ જરાય નથી અને એમાંયે બિઝનેસની સેન્સ તો જરાય નથી. પાર્ટી પેમેન્ટ લઈને તૈયાર બેઠી છે, હમણાં સુધી પાર્ટી લાવો પાર્ટી લાવો કરતો હતો અને હવે સાલો ભાવ ખાય છે. નકુલભાઈએ, કક્કડ સાહેબ માટે સલુકાઈ પરથી તોછડાઈની યાત્રા બહુ ઝડપથી પુરી કરી નાખી.

હવે ક્ષેપકભાઈથી રહેવાયું નહીં અને એમણે કહ્યું “નકુલભાઈ તમને બિલકુલ ના ગમે એવી એક વાત કહું?”

હા, હા. બોલો બોલો, આપણને બધું ફાવે, બધું ચાલે, બધું ગમે. તમ તમારે બિંદાસ બોલો. નકુલભાઈએ ઓવર કૉન્ફિડન્સમાં કહ્યું.

બિઝનેસની સમજ કક્કડ સાહેબને તો પુરે પુરી છે પણ……

પણ શું??

પણ તમને નથી, જરાય નથી. નકુલભાઈને લાગતું નહોતું કે કે ક્ષેપકભાઈથી ટીકડી પણ ફૂટશે પણ આ તો એમણે ટેટો ફોડ્યો!!

નકુલભાઈએ એ રીતે ક્ષેપક સામે જોયું જાણે વર્લ્ડકપની પાકિસ્તાન સામેની મેચ હાર્યા કરતાંયે વધુ મોટો અપરાધ એમનાથી થઇ ગયો હોય.

મેં પહેલાં જ કીધું હતું કે મારી વાત તમને નહીં ગમે. પણ ન્યુટ્રલ વ્યક્તિ તરીકે કહું છું કે તમે બાફ્યું, બહુ મોટો બફાટ કર્યો.

શેનો બફાટ?? કોમ્પ્લિમેન્ટ્સની જયાંથી અપેક્ષાઓ હતી ત્યાંથી ક્મ્પ્લેઇન્સ આવવા માંડી એના માનસિક આઘાતની કળ નકુલભાઈને હજી વળતી નહોતી.

નકુલભાઈ, બિઝનેસ ભલે બે બિઝનેસ હાઉસ કે બે કંપની વચ્ચે થતો હોય પણ અંતે તો સામસામે બે જીવંત વ્યક્તિઓ બેઠેલા હોય છે, લાગણીથી છલકતાં, પોતાની માન્યતાઓ અને ધર્મને આધારે પોતાના જ્ઞાન કે સંસ્કારને જ સાચા માનતા બે માણસો સામસામે બેઠા હોય છે.

હા, તો??

બિઝનેસની સેન્સ છે એવું ત્યારે કહેવાય જ્યારે ઓછામાં ઓછું એક જણ સમજદારી દાખવે.

કેવી સમજદારી વળી?

સમજદારી એટલે સામેવાળાની માન્યતા પર આકરો આઘાત ના કરવો, કટાક્ષ તો જરાય ના કરવો, એને અપમાનિત થયાની લાગણી થાય કે એની માન્યતાની હાંસી ઉડાવ્યાની અનુભૂતિ થાય એવું એક પણ સ્ટેટેમેન્ટ ના બોલવું, એને જ સમજદારી કહેવાય અને એને જ બિઝનેસ કરવાનું ભાન છે એમ કહેવાય. તમે ગમે તે ધર્મ કે પંથ પાળતા હો, તમારી પુનર્જન્મ વિષે કે કર્મ વિષે કોઈ પણ માન્યતા હોય, તમારી જે કંઇ પણ ફિલસુફી હોય એને ધંધામાં વચ્ચે ના લવાય.

જાણે ત્રણ વર્ષનું B.A. સાઇકોલોજી 3 વાક્યમાં ક્ષેપકભાઈના મુખેથી આવી ગયું!

સમજદારી એને કહેવાય કે આવી ચર્ચામાં પડવું જ નહીં અને પડો તો સિફ્તથી ડિપ્લોમેટિક એટલે કે મોઘમ જવાબ આપી વિવાદથી દૂર રહેવું, ખાસ કરીને જ્યારે સામેવાળા બાઇંગ (Buying) પોઝિશનમાં હોય ત્યારે ઉપરોક્ત પગલાંમાંનું કોઈ પણ પગલું એ બુદ્ધિનો પુરાવો ના કહેવાય પણ બુદ્ધિનું પ્રદર્શન કહેવાય, કેમ કે એનાથી એમના સેન્ટિમેન્ટસ ઘવાય અને તમારી સાથે ધંધો કરવાનું ડિસિઝન તરત બદલાય. જાણે B.A. પછી M.A. સાઇકોલોજી પણ ક્ષેપકભાઈના અગાધ અનુભવ અને સાયકોલોજીની ઊંડી સમજના કારણે 2 મિનિટમાં પતી ગયું.

હું છાતી ઠોકીને કહું છું કે કક્કડ સાહેબ ઓછો નફો લઈને કે નુકશાન કરીને કે આપણાને ઓફર કરેલા ભાવથી ઓછો ભાવ લઇને પણ આ ડીલ અન્ય કોઈ સાથે કરશે. લખી રાખજો તમારે લખવું હોય તો. જાણે ક્ષેપકભાઈએ M.A. પછી M. Phil સાઇકોલોજી ભણાવવાનું શરૂ કર્યું.

નકુલભાઈ મગરૂરીથી મૂછમાં મલકાયા જાણે કે એમને કોન્ફિડન્સ હતો કે આવું તો નહીં જ થાય. બલ્કે એમ કહો કે એમને એવું હતું કે આવું તો હું નહીં જ થવા દઉં. આ સોદો હું મારા હાથમાંથી નહીં જ જવા દઉં.

પણ દિવાળી પછીના ઉઘડતા બજારે જ એમને સમાચાર મળ્યા કે કક્કડ સાહેબે ડીલ અન્ય કોઈ સાથે ઓછા ભાવે કરી નાખી છે ત્યારે નકુલભાઈને અહેસાસ થયો કે…

બિઝનેસમેનનું માનસ સમજતા પહેલાં એમાંથી બિઝનેસ કાઢીને એનામાં વસતાં મેનનું માનસ સમજવું પડે.

અસ્તુ

કથા બીજ (શ્રી નિકેતન ગાંધી:અમદાવાદ)

નોંધ: તમામ પાત્રોના નામ, સ્થળ, લાયકાત કાલ્પનિક છે. કોઈ જીવિત યા મૃત વ્યક્તિ કે ઘટના સાથે સરખાપણું એ માત્ર સંયોગને આધીન હોઈ શકે.

________________________________________________________

બિઝનેસ લર્નિંગ:

1) બિઝનેસ ડીલ કરતા પહેલા રેપો બિલ્ડીંગ નામની ખુબ જ અગત્યની પ્રક્રિયા સૌ બિઝનેસમેને કરવાની હોય છે, એમાં જો ચૂક થઇ તો ડીલ નિષ્ફળ જવાની પુરી સંભાવના છે.

2) ધાર્મિક માન્યતાઓ જાણે અજાણ્યે પણ માણસનો અંદરથી છુપી રીતે દોરી સંચાર કરતી હોય છે.

3) પૈસાના ભોગે પણ ધાર્મિક માન્યતાને સાચવવી એ બચપણથી જ અજાણતા આપણને સૌને શીખવાડી દેવામાં આવ્યું હોય છે.

4) ધાર્મિક માન્યતાની વાત આવે ત્યારે ભણેલો માણસ પણ 200 વર્ષ પાછળ જતો રહે છે.

5) બિઝનેસમેન સાથે બિઝનેસ કરતા પહેલાં એની અંદરના મેનને સમજવો પડે.

6) બિઝનેસ ડીલ કરતી વખતે સામેવાળા ચુપ થઇ જાય એવી ધારદાર દલીલો કરવાં કરતાં પોતે સાચા હોવા છતાં (બિઝનેસ સિવાયની વાતમાં) ચૂપ થઇ જવું એ ડહાપણનું કામ છે.

7) મોટા યુધ્ધો જીતવા માટે ઘણીવાર નાની નાની લડાઈઓ હારવી પડતી હોય છે.

8) બુદ્ધિના પુરાવા આપવાના હોય, પ્રદર્શન ના કરવાનું હોય.

9) અણગમો અને નારાજગી છુપાવતા આવડવું એ સારા બિઝનેસમેનનું લક્ષણ છે.

10) અસહમતીને હંમેશા સીધી મ્હોં પર ના કહેવાને બદલે અરે વાહ! ડિફરન્ટ થોટ્સ કે એવું કોઈ વાક્ય કહી નમ્રતાપૂર્વક અસહમત થવાની કળા હસ્તગત કરવી ઘટે.

11) બિઝનેસ મિટિંગમાં (બને તો દરેક જગ્યાએ હંમેશા માટે) પોલિટિક્સ, ધર્મ, વિવાદિત વિષય કે કોર્ટમાં પેન્ડિંગ કેસ પર ચર્ચામાં ભાગ લેવાનું કે ટિપ્પણી કરવાનું ટાળવું અને કરવી જ પડે તો મોઘમ જવાબ આપવો. આનાથી બિઝનેસ ડીલ પર તલવાર તોળાઈ શકે છે.

12) આપને સુજ્ઞ વાચકોને અન્ય કોઈ લર્નિંગ લાગે તો કોમેન્ટ બોક્ષમાં લખશોજી.

________________________________________________________________

BizTea ના ફાઉન્ડર અને બિઝનેસ કોચ દીપક મકવાણા દ્વારા આ પ્રસંગ કથા બીજ શ્રી નિકેતન ગાંધી:અમદાવાદ પાસેથી એમનો જાત અનુભવ  મેળવીને આલેખાયો છે. બિઝનેસના જટિલ કૂટપ્રશ્નોને ખૂબ સરળ ભાષામાં સમજાવવા એ તેમની આગવી ઓળખ છે. નાના પણ વાસ્તવિક પ્રસંગો થકી મળતું બિઝનેસ લર્નિંગ સામાન્ય બિઝનેસમેનથી લઈને એન્ટરપ્રાઈઝ લેવલની CXO ટીમને આકર્ષે છે.

બિઝનેસની મોટી બારાખડીથી લઈને નાની બારાખડી સુધીની તમામ વિગત જાણે માનીતા શિક્ષક પાસેથી શીખતા હોઈએ એ સરળતાથી પચાવી શકાય એ રીતે રજૂ કરવામાં તેઓ માહેર છે.

તેઓ છેલ્લા ૨૩ વર્ષથી બિઝનેસ કોચિંગ કરી રહ્યા છે. છેલ્લા બે વર્ષથી તેઓ એશિયાનું સર્વપ્રથમ કન્ટીન્યુઅસ બિઝનેસ લર્નિંગ પ્લેટફોર્મ BizTea સકસેસફૂલી ચલાવી રહ્યા છે. જેમાં તેઓ અનેક આંત્રપ્રિનિયોર્સ અને બિઝનેસમેન કક્ષાના વ્યક્તિઓને પોતાના અનુભવનો અર્ક વહેંચે છે અને તેમની સફળતામાં પોતાના જીવનનો સંતોષ માને છે.

શ્રી દીપક મકવાણાનો આપ અહીં સંપર્ક કરી શકો છો.

# મોબાઈલ 9265031591

# ઇ-મેઈલ google@biztea.in